15 million fuqaroning ma’lumotlari darknetga tarqaldi
Davlatning asosiy OAuth autentifikatsiya serveri buzilishi natijasida O‘zbekistonning kamida 15 million fuqarosiga oid shaxsiy ma’lumotlar maxfiy tarmoq, ya’ni darknet muhitiga tarqalib ketgani haqida xabarlar tarqaldi. Bu haqda Zamin.uz xabar berdi.
Ushbu ma’lumotlar hukumat axborot tizimlarida saqlangan bo‘lib, ularning xavfsizligi buzilgani ehtimol qilinmoqda. Xususan, Ijtimoiy himoya milliy agentligi (IHMA) axborot tizimi ham kiberhujumlarga uchragan.
Bu tizimda fuqarolarning tibbiy ma’lumotlari jamlangan bo‘lib, ularning maxfiyligi jiddiy xavf ostida qoldi. Shuningdek, Ichki ishlar organlariga tegishli shaxsiy ma’lumotlarning ham tarqalishi aynan OAuth serverining buzilishi bilan bog‘liq bo‘lishi mumkinligi ta’kidlanmoqda.
Manbalarga ko‘ra, hakerlar oddiy pasport ma’lumotlaridan tortib, fuqarolarning ish joylari va tibbiy tarixlariga oid maxfiy axborotlargacha bo‘lgan ma’lumotlarni qo‘lga kiritgan bo‘lishi mumkin. Darknetda tarqalgan fayllar orasida turli fotosuratlar ham mavjudligi aytilmoqda.
Ulardan birida bankirlar Hasan Rahmatov, Ayubxon Kamolov hamda Raqamli texnologiyalar vazirining birinchi o‘rinbosari Oleg Pekos aks etgani qayd etilgan. Mazkur holat bo‘yicha rasmiy ma’lumotlar hali tasdiqlanmagan bo‘lsa-da, bu kabi xabarlar jamoatchilikda xavotir uyg‘otmoqda.
Ma’lumot: Zamin.uz.
