Chet elda vafot etgan migrantlar jasadi davlat hisobidan olib kelinadi
Endilikda O‘zbekiston fuqarolari mehnat migratsiyasi davomida xorijda vafot etsa, ularning jasadini Vatanga olib kelish xarajatlari davlat tomonidan qoplanadi. Bu haqda Zamin.uz xabar berdi.
Bu tartib “Dafn etish va dafn ishi to‘g‘risida”gi qonunga kiritilgan yangi qo‘shimchalar orqali mustahkamlandi. Yangi qoidaga ko‘ra, chet elda mehnat faoliyati davomida vafot etgan fuqarolarning jasadini olib kelish xarajatlari Migratsiya jamg‘armasi mablag‘lari hisobidan moliyalashtiriladi.
Ushbu mablag‘larni ajratish Vazirlar Mahkamasi huzuridagi Migratsiya agentligi tomonidan amaldagi qonunchilikka muvofiq amalga oshiriladi. Mazkur qonun Qonunchilik palatasi tomonidan 2025 yil 1 iyulda qabul qilingan va 2025 yil 4 sentyabrda Senat tomonidan ma’qullangan.
Shu bilan birga, hujjat orqali boshqa bir qator normativ-huquqiy hujjatlarga ham o‘zgartirish va qo‘shimchalar kiritilgan. Bu o‘zgarishlar mehnat migratsiyasida bo‘lgan fuqarolarning huquqlarini himoya qilish, ularning oila a’zolarini moliyaviy xarajatlardan asrash hamda jasadlarni Vatanga qaytarish jarayonini davlat tomonidan qo‘llab-quvvatlashni ta’minlashga qaratilgan.
Shu tariqa, marhumlarning oilalari uchun qo‘shimcha yuk bo‘lmasligi uchun zarur mexanizmlar aniq belgilab berildi.
