Antikvar avtomobillar uchun maxsus raqamlar joriy etiladi
O‘zbekistonda ishlab chiqarilganiga 50 yildan oshgan avtomobillardan foydalanish va ularni qayta ro‘yxatdan o‘tkazish masalasida ba’zi xabarlar tarqalgan edi. Bu haqda Zamin.uz xabar berdi.
Mazkur masalaga aniqlik kiritish maqsadida Ichki ishlar vazirligi Jamoat xavfsizligi departamenti izoh berdi. Unga ko‘ra, antikvar deb topilgan transport vositalari ushbu tartibdan mustasno hisoblanadi.
Antikvar avtomobillar ishlab chiqarilganiga 50 yil yoki undan ortiq bo‘lgan, asl holati saqlanib qolgan, ya’ni tashqi ko‘rinishi, tuzilishi va asosiy qismlari buzilmagan avtomobillar sifatida tan olinadi. Vazirlar Mahkamasining qaroriga binoan, bunday avtomobillar uchun yangi ANT seriyasiga oid davlat raqamlari joriy etiladi.
Ichki ishlar vazirligi ma’lumotiga ko‘ra, fuqarolar antikvar transport vositalariga davlat raqami olish uchun 2024-yil 1-fevraldan boshlab hududiy yo‘l harakati xavfsizligi boshqarmalariga murojaat qilishlari lozim. Antikvar avtomobillar uchun alohida belgilangan davlat raqamlari beriladi.
Yuridik shaxslarga tegishli antikvar avtomobillarga I, IA, IE yoki IAE tipidagi, ANT seriyali raqamlar ajratiladi. Jismoniy shaxslarga tegishli avtomobillar esa III, IIIA, IIIE yoki IIIAE tipidagi, ANT seriyali raqamlar bilan ta’minlanadi.
Shuningdek, yo‘nalishsiz taksilarga tegishli bo‘lgan avtomobillar uchun TTT seriyali raqamlar berilishi ko‘zda tutilgan. Shunday qilib, 50 yildan oshgan avtomobillar umuman taqiqlanmaydi, aksincha, agar ular asl holatini saqlagan bo‘lsa, antikvar sifatida ro‘yxatdan o‘tkazilib, maxsus davlat raqamlari bilan foydalanishga ruxsat beriladi.
Manba: One.uz
