Farg‘onada 800 o‘rinli zamonaviy shifoxona quriladi
Farg‘ona viloyatida xalqaro standartlarga mos, 800 o‘rinli zamonaviy ko‘p tarmoqli shifoxona qurilishi rejalashtirilmoqda. Bu haqda Zamin.uz xabar berdi.
Ushbu loyiha O‘zbekistonning KOC Construction kompaniyasi va Saudiya Arabistonining Vision International Investment kompaniyasi hamkorligida amalga oshiriladi. Viloyat hokimligi xabariga ko‘ra, mazkur shifoxona uch yil ichida loyihalashtiriladi, moliyalashtiriladi, eng zamonaviy tibbiy uskunalar bilan jihozlanadi va to‘liq qurib bitkaziladi.
Shifoxona yuqori darajali xizmatlarni, jumladan, kardiojarrohlik, neyroxirurgiya va organ transplantatsiyasi kabi murakkab operatsiyalarni amalga oshirishga ixtisoslashadi. Yangi tibbiyot markazi nafaqat Farg‘ona viloyati, balki unga yaqin joylashgan hududlar aholisi uchun ham xizmat ko‘rsatadi.
Shifoxonaning ishga tushirilishi mintaqadagi tibbiy xizmat sifatini oshirishga va aholiga qulaylik yaratishga xizmat qiladi. Bu loyiha sog‘liqni saqlash sohasida muhim qadam bo‘lib, zamonaviy tibbiy xizmatlardan foydalanish imkoniyatini kengaytiradi.
