Maktabga tayyorlov bosqichi majburiy ta’limga kiritiladi
Prezidentning yangi farmoniga binoan, O‘zbekistonda maktabgacha ta’lim tizimida muhim o‘zgarishlar amalga oshiriladi. Bu haqda Zamin.uz xabar berdi.
Endilikda 6 yoshli bolalar uchun bir yillik maktabga tayyorlov bosqichi majburiy ta’limning dastlabki qismi sifatida joriy etiladi. Ushbu tayyorlov bosqichi 2027–2028 o‘quv yilidan boshlab amalda bo‘ladi.
Uni muvaffaqiyatli tamomlagan bolalarga davlat tomonidan elektron shaklda sertifikat beriladi. Ushbu hujjat kelgusida o‘quvchining maktab shahodatnomasida ham qayd etiladi.
Bundan tashqari, 2026–2028 yillar davomida mamlakat bo‘ylab “Yangi avlod” nomli davlat bog‘chalari tashkil etilishi rejalashtirilgan. Ushbu muassasalar bolalarning robototexnika, ilm-fan, xorijiy tillar, ijodiy va jismoniy rivojlanish yo‘nalishlarida ta’lim olishlari uchun maxsus sharoit yaratadi.
Bolalar uchun zamonaviy o‘yin va o‘quv muhiti taqdim etilishi ko‘zda tutilgan. Shuni alohida ta’kidlash joizki, yangi tizim bosqichma-bosqich joriy etiladi.
2026–2027 o‘quv yilida qabul tartibi avvalgi tartibda davom etadi, ya’ni bolalar 7 yoshga to‘lgan yili 1-sinfga qabul qilinadi. Yangi tizimning joriy etilishi ta’lim sifatini oshirishga qaratilgan.
