Tog‘ hududlarida zamonaviy mikroavtobuslar qatnovi yo‘lga qo‘yildi

Toshkent viloyatining tog‘li hududlarida transport infratuzilmasini rivojlantirish va turizmni qo‘llab-quvvatlash maqsadida yangi loyihaga start berildi. Bu haqda Zamin.uz xabar berdi.

Endilikda “Chinorkent–Yusufxona–Chimyon–Amirsoy” yo‘nalishida zamonaviy mikroavtobuslar qatnovi yo‘lga qo‘yildi. Bu yangilik nafaqat mahalliy aholiga, balki sayyohlar uchun ham katta qulaylik yaratadi.

Loyiha doirasida xavfsizlik va qulaylikni ta’minlash uchun maxsus sinov qatnovlari amalga oshirildi. Yo‘l sharoitlariga mos keladigan va zamonaviy talablarga javob beruvchi “Ford” rusumli mikroavtobuslar tanlandi.

Jami 20 ta bunday transport vositasi xarid qilinib, mamlakatga keltirildi. Ushbu mikroavtobuslar Chinorkent, Chimyon va Amirsoy kabi mashhur sayyohlik maskanlariga qatnaydi.

Shu bilan birga, ular tog‘li hududlarda yashovchi aholiga ham jamoat transporti xizmatini ko‘rsatadi. Bu tashabbus orqali turizm infratuzilmasini yaxshilash, ekoturizmni rivojlantirish va aholiga xavfsiz hamda qulay transport tizimini taqdim etish maqsad qilingan.

Ushbu loyiha mamlakatning turizm salohiyatini oshirish yo‘lida muhim qadam bo‘lishi kutilmoqda. Manba: Zamin.uz