O‘zbekistonda xalqaro standartlarga o‘tish boshlandi
Prezident Shavkat Mirziyoyev 12-fevral kuni mamlakatimizda texnik tartibga solish tizimini xalqaro standartlarga moslashtirish bo‘yicha taqdimot bilan tanishdi. Bu haqda Zamin.uz xabar berdi.
Ushbu islohotlar O‘zbekistonning Jahon savdo tashkilotiga a’zo bo‘lish yo‘lidagi muhim qadam bo‘lib, mahalliy tadbirkorlikka katta imkoniyatlar yaratadi. Hozirgi kunda mavjud 33 mingdan ortiq standartning yarmi zamon talablariga javob bermaydi.
Yig‘ilishda davlat nazorati tizimidan bozor nazorati tizimiga o‘tish haqida so‘z bordi. Endilikda mahsulotda kamchilik aniqlansa, tadbirkorning faoliyati cheklanmaydi, balki sifatsiz mahsulotning aylanmasi to‘xtatiladi.
Shu bilan birga, tadbirkor o‘z mahsulotining sifat va xavfsizligi uchun javobgarlikni o‘z zimmasiga oladi. Barcha sohalarda xalqaro standartlarga o‘tish bosqichma-bosqich amalga oshiriladi.
Jumladan, 2026-yilning 1-iyulidan to‘qimachilik, elektrotexnika va avtomobilsozlik sohalarida yangi talablar joriy etiladi. 2027-yildan neft-gaz, metallurgiya va qurilish sohalarida, 2028-yildan esa energetika va kimyo sanoati bo‘yicha xalqaro standartlar qo‘llaniladi.
Joriy yilning o‘zida taxminan 4,5 mingta yangi xalqaro standart qabul qilinishi rejalashtirilgan. Bundan tashqari, sertifikatlash jarayonidagi ortiqcha xarajat va korrupsiyaga barham berish maqsadida sinov xizmatlari xususiy sektorga o‘tkaziladi.
Jahon miqyosida taniqli “Intertek” (Angliya), “SGS” (Shvetsiya) va “TÜV” (Germaniya) kabi kompaniyalar jalb qilinadi. Akkreditatsiya markazi esa Vazirlar Mahkamasiga bo‘ysundiriladi.
Mahsulotlarimizning xalqaro bozordagi raqobatbardoshligini oshirish uchun “CUz” milliy muvofiqlik belgisi joriy etiladi. Bu belgi o‘zbek mahsulotlarining xavfsizligi va sifatini tasdiqlaydi.
Shuningdek, sinov laboratoriyalari to‘liq raqamlashtirilib, inson omili kamaytiriladi. Ushbu islohotlar tadbirkorlarni byurokratik to‘siqlardan xalos etib, milliy iqtisodiyotning jahon bozoriga integratsiyalashuvini jadallashtiradi.
Endi mahalliy mahsulotlar xalqaro miqyosda raqobatbardosh bo‘lishi va yangi bozorlarni egallashi kutilmoqda.
