“Mohirlik va biznes soati” maktablarda joriy etiladi
2026–2027 o‘quv yilidan boshlab o‘quv muassasalarida o‘quvchilarni startap g‘oyalarini yaratish, ularni shakllantirish va real loyihalarga aylantirishga yo‘naltirilgan “Mohirlik va biznes soati” tadbirlari muntazam o‘tkazilishi rejalashtirilmoqda. Bu haqda Zamin.uz xabar berdi.
Ushbu tashabbus orqali o‘quvchilarda nafaqat nazariy bilimlarni oshirish, balki amaliy ko‘nikmalarni rivojlantirish maqsad qilingan. Yangi tizim “o‘qiymiz va ishlab topamiz” tamoyiliga asoslanadi.
Mazkur tadbirlar bosqichma-bosqich joriy qilinadi. Xususan, umumiy o‘rta ta’limning 9–11-sinflari va o‘rta maxsus, kasbiy ta’lim muassasalari o‘quvchilari uchun har oy kamida ikki marta “Mohirlik va biznes soati” tashkil etilishi belgilangan.
Faol maktablarda bu tadbirlar yanada ko‘proq o‘tkazilishi mumkin, ammo minimal reja har oy ikki marotaba deb belgilangan. Tadbirlar bir necha yo‘nalishda tashkil etiladi.
Birinchi yo‘nalish — “Eng yaxshi startap g‘oyasi” tanlovi. Tuman bosqichi g‘oliblariga 5 million so‘mgacha, viloyat bosqichi g‘oliblariga esa 10 million so‘mgacha mukofot puli ajratilishi rejalashtirilgan.
Bu mablag‘ o‘quvchilarning loyihalarini prototipga aylantirish uchun qo‘shimcha turtki bo‘lib xizmat qiladi. Ikkinchi yo‘nalish — har chorakda o‘quvchilarning loyihalarini taqdimot qilish.
Ushbu taqdimotlarda o‘quvchilar o‘z g‘oyalarini ota-onalar, biznes va ilmiy jamoatchilik vakillari oldida himoya qiladi, savollarga javob beradi va fikr-mulohazalar oladi. Bu jarayon o‘quvchilarda o‘z fikrini erkin ifoda etish va muloqot ko‘nikmalarini rivojlantirishga yordam beradi.
Uchinchi yo‘nalish — bozorga chiqish. Marketpleyslar bilan hamkorlik o‘rnatilib, o‘quv muassasalarida tayyorlangan mahsulotlarni sotish amaliyoti yo‘lga qo‘yiladi.
Bu esa o‘quvchilarda haqiqiy bozor sharoitlarini tushunish va mehnat natijasini ko‘rish motivatsiyasini oshiradi. Shuningdek, 2026 yil 1 apreldan boshlab davlat organlari va tashkilotlari o‘z sohalaridagi muammolar bo‘yicha kraudsorsing platformalari orqali tanlovlar e’lon qilishi va har oy “Startap kuni” tadbirlarini o‘tkazishi rejalashtirilgan.
Bu orqali o‘quvchilarning g‘oyalari nafaqat ta’lim muassasalarida, balki real muammolarni hal qilishda ham qo‘llaniladi. Mazkur tashabbuslar yosh avlodni ijodkorlikka, innovatsiyaga va tadbirkorlikka yo‘naltirishga xizmat qiladi.
Shu bois, o‘quvchilarga hozirdan o‘z qiziqishlari va g‘oyalari ustida ishlash tavsiya etiladi. Bu jarayon kelajakda ularning muvaffaqiyatli startap va biznes loyihalarini amalga oshirishiga zamin yaratadi.
Manba: One.uz.
