Mahalliy avtomobillar uchun kreditlar arzonlashadi
13-fevral kuni Prezident Shavkat Mirziyoyev rahbarligida o‘tkazilgan yig‘ilishda iqtisodiy o‘sishni ta’minlash va aholi iste’molini qo‘llab-quvvatlashga qaratilgan muhim masalalar muhokama qilindi. Bu haqda Zamin.uz xabar berdi.
Yig‘ilishda mahalliy avtomobillarga bo‘lgan talabni oshirish maqsadida avtokredit stavkalarini pasaytirish va kredit ajratish hajmini kengaytirish zarurligi ta’kidlandi. Bugungi kunda mamlakatda yiliga 650 ming dona avtomobil ishlab chiqarish quvvatiga ega bo‘lgan to‘rtta yirik korxona faoliyat yuritmoqda.
Shu bilan birga, ishlab chiqarishni yanada mahalliylashtirish uchun joriy yilda 300 dan ortiq korxona bilan hamkorlikda qo‘shimcha 763 turdagi ehtiyot qismlarni ishlab chiqarish rejalashtirilgan. Bu mahalliy sanoatning rivojlanishi va avtomobillar narxining pasayishiga xizmat qiladi.
Yig‘ilishda ishlab chiqariladigan avtomobillar sonini 510 ming donaga yetkazish vazifasi ham belgilandi. Bu esa bozordagi talab va taklif muvozanatini saqlash, navbat va kutish muddatlarini qisqartirishga yordam beradi.
Shuningdek, Chirchiqdagi agrotexnika klasterining samarali ishlashiga alohida e’tibor qaratildi. Agar klaster to‘liq quvvat bilan ishlasa va lizing xizmatlari orqali qulay moliyaviy sharoitlar yaratilsa, dehqon va fermerlar yiliga kamida 15 mingta texnika xarid qilishi mumkinligi qayd etildi.
Yig‘ilish yakunida avtomobil sanoati mas’ullariga ishlab chiqarish dasturini 10,5 foiz o‘sishga mos ravishda qayta ko‘rib chiqish va mavjud imkoniyatlardan samarali foydalanish bo‘yicha topshiriqlar berildi. Bu chora-tadbirlar mahalliy avtomobil bozorini rivojlantirish va aholining ehtiyojlarini qondirishga qaratilgan.
Ma’lumot: zamin.uz.
