Firibgarlikdan saqlaning: Pensiya jamg‘armasi ogohlantiradi

So‘nggi paytlarda pensiya yoshidagi fuqarolarga telefon orqali firibgarlik yo‘li bilan murojaat qilinayotgan holatlar ko‘paymoqda. Bu haqda Zamin.uz xabar berdi.

Pensiya jamg‘armasi bu borada fuqarolarni hushyor bo‘lishga chaqirdi. Ma’lum bo‘lishicha, firibgarlar o‘zlarini bank yoki Pensiya jamg‘armasi xodimi sifatida tanishtirib, fuqarolarga “Pensiyangiz kelasi oydan oshadi.

Buning uchun shaxsiy ma’lumotlaringizni yoki telefoningizga kelgan kodni aytishingiz kerak”, degan mazmunda yolg‘on ma’lumot berishmoqda. Ular shu yo‘l bilan fuqarolarning ishonchiga kirishga va shaxsiy ma’lumotlarini qo‘lga kiritishga harakat qilmoqda.

Pensiya jamg‘armasi fuqarolarga shuni eslatmoqdaki, jamg‘arma xodimlari hech qachon telefon orqali shaxsiy ma’lumotlar yoki SMS orqali kelgan kodlarni so‘ramaydi. Shu sababli, begona shaxslarga pasport, plastik karta, JSHSHIR (PINFL) raqami kabi shaxsiy ma’lumotlarni taqdim etish qat’iyan man etiladi.

Agar shubhali qo‘ng‘iroqlar yoki firibgarlik urinishlariga duch kelsangiz, zudlik bilan 1271 – Pensiya jamg‘armasining ishonch telefoni yoki 102 – Ichki ishlar organlari raqamiga murojaat qilishingiz tavsiya etiladi. Bu kabi holatlarning oldini olish uchun hushyorlikni oshirish va shaxsiy ma’lumotlarni begona shaxslar bilan ulashmaslik muhimdir.