2026 yilda bolalar xavfsizligi kuchaytiriladi.
O‘zbekistonda 2026 yil "Mahallani rivojlantirish va jamiyatni yuksaltirish yili" deb e’lon qilinishi doirasida davlat dasturi tasdiqlanmoqda. Bu haqda Zamin.uz xabar berdi.
Ushbu dasturda ayollar va bolalar xavfsizligini ta’minlash bo‘yicha muhim tashabbuslar ko‘zda tutilgan. Ularning eng diqqatga sazovorlaridan biri — 14 yoshga to‘lmagan bolalarga nisbatan sodir etilgan jinsiy jinoyatlar uchun umrbod qamoq jazosi joriy etilishi rejalashtirilmoqda.
Mazkur qonunchilik o‘zgarishlari 2026 yil 1 apreldan kuchga kirishi kutilmoqda. Bu esa bolalarga qarshi sodir etiladigan og‘ir jinoyatlar uchun jazoni yanada qat’iylashtirishni nazarda tutadi.
Mutaxassislar ta’kidlashicha, bola xavfsizligi masalasi davlat siyosatining ustuvor yo‘nalishlaridan biri bo‘lishi lozim. Ushbu tashabbus profilaktika va jazolashning muqarrarligi orqali jamiyatda himoyani kuchaytirish maqsadini ko‘zda tutadi.
Davlat dasturida boshqa muhim yo‘nalishlar ham belgilangan. Xususan, zo‘ravonlikka qarshi kurashni kuchaytirish, sud-huquq tizimini takomillashtirish, korrupsiyaga qarshi kurash choralarini yangi bosqichga olib chiqish va “yashil” energiya ulushini oshirish kabi masalalar ham kun tartibiga kiritilgan.
2026 yilgi islohotlarning asosiy maqsadi bolalar xavfsizligini amalda ta’minlashdir. Agar bu tashabbuslar muvaffaqiyatli amalga oshirilsa, jamiyatda adolat va xavfsizlikni ta’minlash borasida ijobiy natijalar kutilmoqda.
Manba: one.uz.
