Andijon hokimi kaltaklangani haqidagi xabarlar yolg‘on
Ijtimoiy tarmoqlarda Andijon shahar hokimi Elyorbek Karimov va uning yordamchisi noma’lum shaxslar tomonidan kaltaklangani haqida xabarlar tarqaldi. Bu haqda Zamin.uz xabar berdi.
Ushbu masala yuzasidan shahar hokimi rasmiy munosabat bildirdi. Elyorbek Karimovning so‘zlariga ko‘ra, tarqalgan xabarlar haqiqatga mos emas.
U hech qanday janjal yoki zo‘ravonlik holati yuz bermaganini ta’kidladi. Hokim o‘z bayonotida quyidagilarni aytib o‘tdi: “Soppa-sog‘man, bunday voqea sodir bo‘lmagan.
Bu gaplar qayerdan chiqqanini tushunmayman. Ayni paytda ishlarimiz odatdagidek davom etmoqda.
Tarqatilgan xabarlar yolg‘ondir.” Shuningdek, Elyorbek Karimov bu masala bo‘yicha huquqni muhofaza qiluvchi idoralarga rasmiy murojaat qilganini ma’lum qildi. Hozirda vakolatli organlar bu xabarlarning tarqalish sabablarini o‘rganmoqda.
Asossiz ma’lumot tarqatgan shaxslar aniqlanib, ularga qonuniy choralar ko‘rilishi rejalashtirilgan. Manba: Zamin.uz
