Masjidlarda tarovih namozlari uchun xavfsizlik kuchaytiriladi
18-fevraldan boshlab respublika bo‘ylab 2000 dan ortiq masjidda tarovih namozlari o‘qilishi rejalashtirilmoqda. Bu haqda Zamin.uz xabar berdi.
Bu haqda Ichki ishlar vazirligi Jamoat xavfsizligi departamenti ma’lum qildi. Tarovih namozlari har kuni soat 20:30 dan keyin boshlanadi.
Taxminlarga ko‘ra, ushbu ibodatlarda 1 millionga yaqin fuqaro ishtirok etishi kutilmoqda. Jamoat tartibi va xavfsizlikni ta’minlash maqsadida qariyb 20 ming nafar ichki ishlar organlari, Milliy gvardiya hamda Favqulodda vaziyatlar vazirligi xodimlari jalb etiladi.
Masjidlar atrofi videokuzatuv kameralari bilan jihozlanib, ular maxsus monitoring markazlariga ulangan. Shu bilan birga, yo‘llarda xavfsizlikni ta’minlash uchun 2500 ga yaqin Yo‘l patrul xizmati xodimi xizmat olib boradi.
Ayrim masjidlar joylashgan hududlarda vaqtinchalik harakat cheklovlari joriy etiladi. Kirish joylariga maxsus to‘siqlar o‘rnatilib, masjidlardan 150 metr uzoqlikda avtoturargohlar tashkil etiladi.
Favqulodda vaziyatlar uchun 200 dan ortiq maxsus texnik vositalar ham tayyor holatda bo‘ladi.
