Restoranlar mijozlarni majburiy "set" sotib olishga undamasin

Raqobatni rivojlantirish va iste’molchilar huquqlarini himoya qilish qo‘mitasi Ramazon oyida umumiy ovqatlanish joylariga muhim ogohlantirish bilan murojaat qildi. Bu haqda Zamin.uz xabar berdi.

Unga ko‘ra, restoran va kafelar mijozlarni "aksiya setlar"ni sotib olishga majburlamasligi kerak. Qo‘mita ayrim joylarda "kompleks to‘plam"larni majburiy taklif qilish, minimal narx belgilab, boshqa variantlarni cheklash holatlari kuzatilayotganini ma’lum qildi.

Bunday yondashuv mijozlarning erkin tanlov huquqini cheklaydi. Har bir odam o‘zi xohlagan taomni buyurtma qilish imkoniyatiga ega bo‘lishi kerak va unga faqat "set"ni olish majburiyati yuklanmasligi lozim.

Shuningdek, qonunchilikka ko‘ra, iste’molchi xizmat va mahsulotlarni erkin tanlash, ularning sifati bo‘yicha talab qo‘yish huquqiga ega. Sotuvchilar esa mijozlarga qo‘shimcha mahsulot yoki xizmatni majburlab sotishga haqli emas.

Qo‘mita yana bir muhim jihatga e’tibor qaratdi: sog‘liq masalasi. Agar "set" tarkibida allergiya chaqiruvchi mahsulotlar bo‘lsa va mijozning sog‘lig‘i hisobga olinmasa, bu jiddiy muammolarga olib kelishi mumkin.

Shu sababli, umumiy ovqatlanish korxonalari mijozlarning huquqlari va sog‘lig‘ini birinchi o‘ringa qo‘yishi zarur. Manba: Zamin.uz