O‘zbekistonga xurmo importi hajmi oshdi
O‘zbekistonda xurmoga bo‘lgan talab oxirgi yillarda sezilarli darajada oshib bormoqda. Bu haqda Zamin.uz xabar berdi.
Milliy statistika qo‘mitasi ma’lumotlariga ko‘ra, 2025 yil davomida mamlakatga 19 ta davlatdan jami 13 983 tonna arab xurmosi import qilingan. Ushbu mahsulotning umumiy qiymati 10,3 million AQSH dollarini tashkil etgan.
E’tiborlisi, bu hajm o‘tgan yilga nisbatan 3,4 ming tonnaga ortgan. Bu esa xurmo iste’moli nafaqat Ramazon oyiga, balki yil davomiga tarqalganini ko‘rsatmoqda.
2025 yilda O‘zbekistonga eng ko‘p xurmo yetkazib bergan davlatlar ro‘yxati quyidagicha: Eron (11 ming tonna), Tunis (809,6 tonna), Turkiya (416 tonna), Saudiya Arabistoni (327,9 tonna), Qozog‘iston (229 tonna), Ozarbayjon (223,5 tonna) va BAA (216,9 tonna). Qolgan davlatlardan esa 768,7 tonna xurmo olib kirilgan.
Bozordagi narxlarga kelsak, 2026 yilda O‘zbekiston bozorlarida 1 kilogramm arab xurmosi navi va sifatiga qarab 35 ming so‘mdan 70 ming so‘mgacha sotilmoqda. Bu holat bozorda xurmo mahsulotlariga bo‘lgan talabning yuqori ekanligini ko‘rsatadi.
Ma’lumot manbasi: one.uz.
