21-fevral: Tog‘li hududlarda sel xavfi e’lon qilindi
21-fevral kuni kutilayotgan yog‘ingarchiliklar sababli respublikaning tog‘ oldi va tog‘li hududlarida sel va suv toshqinlari yuzaga kelishi ehtimoli mavjud. Bu haqda Zamin.uz xabar berdi.
Xususan, Qashqadaryo, Surxondaryo, Samarqand, Navoiy, Jizzax, Toshkent, Namangan, Farg‘ona va Andijon viloyatlarining ayrim tumanlari va shaharlarida ham sel kelishi xavfi borligi haqida ogohlantirilmoqda. Shu munosabat bilan tog‘ oldi va tog‘li hududlarda yashovchi aholi, dam olishga chiqqan fuqarolar va haydovchilardan ehtiyot choralarini ko‘rish so‘raladi.
Xavfni kamaytirish maqsadida odamlar yomg‘irli kunlarda yo‘lga chiqishda yoki tabiat qo‘ynida dam olishda ehtiyotkor bo‘lishlari lozim. Toshkent viloyati bo‘yicha sel xavfi eng yuqori deb baholangan hududlar qatoriga Ohangaron, Bo‘stonliq, Parkent, Piskent, O‘rtachirchiq va Yuqorichirchiq tumanlari, shuningdek, Angren va Olmaliq shaharlari kiritilgan.
Ayrim hududlarda yomg‘ir suvlari to‘planib, suv bosish holatlari kuzatilishi mumkinligi ham ta’kidlanmoqda. Shu sababli, ob-havoning keskin o‘zgarishi kutilayotgan kunlarda har qanday sayohat yoki yo‘lga chiqishdan oldin ob-havo sharoitini e’tiborga olish va xavfsizlik choralarini ko‘rish zarur.
Manba: one.uz
