Umra vizasi uchun arizalar 19 martgacha qabul qilinadi

Saudiya Arabistoni Haj mavsumiga tayyorgarlik doirasida Umra ziyoratiga oid yangi tartiblarni e’lon qildi. Bu haqda Zamin.uz xabar berdi.

Unga ko‘ra, Umra vizasi uchun ariza topshirishning oxirgi muddati 19 mart kuni etib belgilangan. Mamlakatga kirishning so‘nggi sanasi 2 aprel, Saudiyadan chiqib ketishning oxirgi kuni esa 18 aprelga to‘g‘ri keladi.

Shu bilan birga, Umra amallarini bajarish ham 18 apreldan kechiktirilmasligi lozim. Har yili millionlab ziyoratchilar Makka va Madina shaharlariga tashrif buyuradi.

Haj mavsumi yaqinlashgani sababli muqaddas shaharlarni tartibga keltirish va ziyoratchilarga qulay sharoit yaratish uchun Umra vizalari vaqtincha to‘xtatiladi. Mutaxassislarning ta’kidlashicha, bu qaror logistika va xavfsizlikni ta’minlash maqsadida qabul qilingan.

Chunki Haj davrida ikki milliondan ortiq ziyoratchi kelishi kutilmoqda. Shu sababli tibbiy xizmatlar, transport va mehmonxona tizimi to‘liq qayta tashkil etiladi.

Ma’lum qilinishicha, Haj mavsumi yakunlangach, taxminan 2026 yil 11 iyun sanasida Umra ziyorati qayta yo‘lga qo‘yilishi rejalashtirilmoqda.