Yangi Toshkentda "boylar shaharchasi" qurilishi rad etildi

So‘nggi kunlarda ijtimoiy tarmoqlarda Yangi Toshkent loyihasi doirasida "boylar shaharchasi" qurilishi haqida xabarlar tarqaldi. Bu haqda Zamin.uz xabar berdi.

Ushbu xabarlarga ko‘ra, har bir villasi 2–3 million dollarga baholanadigan hashamatli uylar qurilishi rejalashtirilgani aytilgan edi. Biroq, Yangi Toshkent shahrini barpo etish direksiyasi matbuot xizmati bu ma’lumotlarni rad etdi.

Rasmiy bayonotga ko‘ra, loyihada bunday alohida hudud qurilishi ko‘zda tutilmagan. Ma’lum qilinishicha, loyihadagi kottej tipidagi uylar xorijiy davlatlarning O‘zbekistondagi elchilari va xalqaro tashkilotlar vakillari uchun xizmat uy-joyi sifatida foydalanilishi uchun mo‘ljallangan.

Shahar qurilishi birinchi bosqichda jadal davom etmoqda va ayni paytda 6 ming gektar maydonda turli qurilish ishlari amalga oshirilmoqda. Rejaga ko‘ra, Yangi Toshkentda 2033 yilga qadar 600 ming aholi uchun zamonaviy turar joylar, ijtimoiy obyektlar, muhandislik infratuzilmasi va xizmat ko‘rsatish binolari qurilishi rejalashtirilgan.

Loyiha to‘liq yakunlangach, shahar ikki million nafar aholi yashaydigan zamonaviy megapolisga aylanishi kutilmoqda. Manba: One.uz.