O‘zbekistonda pensiya tizimini isloh qilish rejalashtirilmoqda
O‘zbekistonda pensiya tizimini isloh qilish bo‘yicha kompleks dastur ishlab chiqilishi rejalashtirilmoqda. Bu haqda Zamin.uz xabar berdi.
Bu dastur xorijiy tajribaga asoslangan holda davlat pensiya ta’minotining samaradorligini oshirishni maqsad qilgan. Ushbu dastur Prezident farmoni bilan tasdiqlangan 2026 yilgi davlat dasturida qayd etilgan.
Dastur doirasida bir nechta muhim yo‘nalishlar belgilangan. Jumladan, jamg‘arib boriladigan pensiya tizimini qayta ko‘rib chiqish, pensiya jamg‘armalarini kapitallashtirishning samarali mexanizmlarini joriy etish, jamg‘arma mablag‘larini uzoq muddatli investitsiyalarga yo‘naltirish orqali kapital bozorini rivojlantirish rejalashtirilgan.
Bundan tashqari, barqaror pensiya tizimini shakllantirish uchun Iqtisodiyot va moliya vazirligi huzurida xalqaro ekspertlar ishtirokida loyiha ofisi tashkil etilishi ko‘zda tutilgan. 2026 yil iyul oyiga qadar pensiya miqdori bo‘yicha yangi qonun loyihasi ishlab chiqiladi.
Ushbu qonunda pensiyadan chegirmalar miqdori pensiyaning 50 foizidan oshmasligi va chegirmadan so‘ng pensiya miqdori rasman belgilangan eng kam iste’mol xarajatlaridan kam bo‘lmasligi belgilab qo‘yiladi. Shuningdek, “Fuqarolarning davlat pensiya ta’minoti to‘g‘risida”gi qonunga ham tegishli o‘zgartirishlar kiritiladi.
Bundan tashqari, ayrim davlat xizmatlarini fuqarolarning murojaatisiz, ya’ni proaktiv tartibda ko‘rsatish mexanizmini joriy qilish rejalashtirilgan. Xususan, pensiya yoshiga yetgan shaxslarga shaxsiy jamg‘arib boriladigan pensiya hisobvarag‘idagi mablag‘lar murojaatsiz to‘lab beriladi.
Davlat oliy ta’lim muassasalariga o‘qishga qabul qilingan yetim va ota-ona qaramog‘idan mahrum bo‘lgan talabalar, ijtimoiy reyestrga kiritilgan oilalar farzandlari yoki nogironligi bo‘lgan talabalar uchun turar joyga yo‘llanmalar ham avtomatik tarzda taqdim etiladi. Shuningdek, pensiya yoshini oshirish masalasi ham muhokamada.
2025 yil oktyabr oyida Pensiya jamg‘armasi ijrochi direktori Murodbek Otajonovning ma’lum qilishicha, erkaklar uchun pensiya yoshi 60 yoshdan 63 yoshga, ayollar uchun esa 55 yoshdan 58 yoshgacha oshirilishi taklif etilgan. Bu jarayon bosqichma-bosqich amalga oshirilishi, ya’ni har yili yarim yildan qo‘shib borilishi rejalashtirilgan.
Manba: One.uz
