«Yangi O‘zbekiston bunyodkorlari» nishoni ta’sis etildi
O‘zbekiston Respublikasi Vazirlar Mahkamasi «Yangi O‘zbekiston bunyodkorlari» ko‘krak nishonini ta’sis etish haqida qaror qabul qildi. Bu haqda Zamin.uz xabar berdi.
Ushbu nishon yangi O‘zbekistonni barpo etish yo‘lida faol fuqarolik pozitsiyasi, vatanparvarlik va fidoyilikni namoyon etgan hamda mamlakat rivoji va xalqaro obro‘sini oshirishga munosib hissa qo‘shgan shaxslarga beriladi. Nomzodlar quyidagi toifalar orasidan tanlanadi: — «El-yurt umidi» jamg‘armasi stipendiatlari; — maktablar va Prezident maktablari o‘quvchilari; — «Yangi O‘zbekiston» universiteti bitiruvchilari; — «Prezident iqtidorli farzandlari» tashabbusi qatnashchilari; — «Iqtidorli yoshlarni qo‘llab-quvvatlash» hamjamiyati a’zolari.
Taqdirlanadiganlar ro‘yxatini shakllantirish Maktabgacha va maktab ta’limi vazirligi tomonidan amalga oshiriladi. Bundan tashqari, chet el fuqarolari va fuqaroligi bo‘lmagan shaxslar ham Tashqi ishlar vazirligi bilan kelishilgan holda ushbu nishon bilan taqdirlanishi mumkin.
«Yangi O‘zbekiston bunyodkorlari» ko‘krak nishoni har yili o‘tkaziladigan hamjamiyat qurultoyida topshiriladi. Nishon bir shaxsga faqat bir marta beriladi.
Manba: zamin.uz
