O‘zbekistonda payshanba “Yoshlar kuni” deb e’lon qilindi
O‘zbekistonda har haftaning payshanba kuni rasman “Yoshlar kuni” deb e’lon qilindi. Bu haqda Zamin.uz xabar berdi.
Ushbu tashabbus yoshlarni qo‘llab-quvvatlash va ularning muammolarini hal qilish maqsadida amalga oshirilmoqda. Bu kun mamlakatdagi vazirliklar, idoralar va mahalliy hokimliklar tomonidan yoshlar bilan bevosita muloqot qilish, ularning fikrlarini tinglash va muammolarini hal etishga qaratilgan faoliyatlar bilan o‘tadi.
Payshanba kunlari sohaviy rahbarlar mahallalar, maktablar va texnikumlarga tashrif buyurib, yoshlar bilan uchrashuvlar tashkil qiladi. Ular yoshlarning o‘z fikr-mulohazalarini bildirishlariga imkon yaratadi, shuningdek, ularning ta’lim olish, sport bilan shug‘ullanish, kasb o‘rganish va ishga joylashish kabi masalalarida yordam ko‘rsatadi.
Yoshlarni tadbirkorlikka jalb etish va xorijiy tillarni o‘rganishlariga ko‘maklashish ham ushbu kunning asosiy yo‘nalishlaridan biridir. Bundan tashqari, yosh tadbirkorlar va startap loyihalari bilan shug‘ullanuvchi yigit-qizlar uchun maxsus grantlar va moliyaviy yordam ajratiladi.
Shuningdek, “Yoshlar kuni” doirasida turli tanlovlar, ko‘rgazmalar va yarmarkalar tashkil etiladi. Ushbu tadbirlar orqali eng yaxshi tomorqachi, fermer, sanoatchi, ijodkor va boshqa sohalarda faoliyat yuritayotgan yoshlar rag‘batlantiriladi.
Mazkur kun yoshlarning ijodiy va mehnat salohiyatini rivojlantirish, yangi iqtidorlarni kashf etish va ularga imkoniyat yaratishda muhim ahamiyat kasb etadi. Shu bilan birga, bu tashabbus yosh avlodning kelajakka bo‘lgan ishonchini mustahkamlashga xizmat qiladi.
Manba: zamin.uz
