Prezident Surxondaryoda Hakim Termiziy maqbarasini ziyorat qildi
O‘zbekiston Respublikasi Prezidenti Shavkat Mirziyoyev Surxondaryo viloyatiga tashrifi davomida an’anaga muvofiq buyuk alloma Hakim Termiziy maqbarasini ziyorat qilishdan boshladi. Bu haqda Zamin.uz xabar berdi.
Ushbu tashrif yurtimizda ma’naviy qadriyatlarga katta e’tibor berilayotganining yorqin namunasidir. Ziyorat chog‘ida Qur’on tilovat qilinib, mamlakatimizga tinchlik, baraka va farovonlik tilab duo qilindi.
Ziyoratdan so‘ng islom sivilizatsiyasi rivojiga ulkan hissa qo‘shgan Hakim Termiziyning boy ma’naviy va ilmiy merosi haqida suhbat bo‘lib o‘tdi. Uning asarlarini chuqur o‘rganish va xalqaro miqyosda targ‘ib qilish masalalariga alohida e’tibor qaratildi.
Bu boradagi faoliyat ajdodlarimiz merosini saqlash va uni kelajak avlodga yetkazish yo‘lidagi muhim qadamlardan biri sifatida qayd etildi. Suhbat davomida milliy qadriyatlarimiz, diniy an’analarimiz va ularning yoshlar tarbiyasidagi o‘rni haqida ham qimmatli fikrlar bildirildi.
Yosh avlodni sog‘lom dunyoqarash, vatanparvarlik va ezgu g‘oyalar ruhida tarbiyalash bugungi kunning dolzarb vazifalaridan biri ekanligi ta’kidlandi. Shuningdek, yoshlar qalbida tarixga hurmat va elga sadoqat tuyg‘ularini mustahkamlash masalasi alohida qayd etildi.
Keyingi yillarda Hakim Termiziy maqbarasi va uning atrofida keng ko‘lamli obodonlashtirish ishlari amalga oshirilgan. Ziyoratchilar uchun qulay sharoitlar yaratilgan, zamonaviy yoritish, isitish va sovitish tizimlari o‘rnatilgan.
Atrof hududlar obod etilib, ko‘p yillik manzarali daraxtlar va mavsumiy gullar ekilgan. Bu ishlar majmuaning yanada fayzli va ko‘rkam bo‘lishiga xizmat qilmoqda.
Tashrif davomida Prezident ushbu maskanni doimiy ravishda obod saqlash, ziyoratchilar uchun qulayliklarni kengaytirish yuzasidan tegishli topshiriqlar berdi. Hakim Termiziy merosi nafaqat tarixiy obida, balki ilm-ma’rifat, ma’naviy tarbiya va milliy o‘zlikni anglash maskani sifatida ham yuksak e’tibor markazida qolmoqda.
Manba: Zamin.uz.
