Prezident “Tomorqa maktabi” faoliyati bilan tanishdi
O‘zbekiston Prezidenti Shavkat Mirziyoyev Surxondaryo viloyatiga tashrifi davomida Termiz tumanidagi “Tomorqa maktabi” faoliyati bilan tanishdi. Bu haqda Zamin.uz xabar berdi.
Ushbu maktab aholini o‘z tomorqasidan samarali foydalanishga o‘rgatish, serdaromad ekinlarni joriy etish, mahsulotni qayta ishlash va saqlash bo‘yicha zamonaviy usullarni o‘rgatishga ixtisoslashgan. Prezident tomorqadan yiliga uch marta hosil olish tajribasi va suv tejovchi texnologiyalarni joriy etish bo‘yicha amalga oshirilayotgan ishlarni ko‘zdan kechirdi.
“Tomorqa maktabi” oddiy o‘quv markazi emas, balki aholini barqaror daromad manbaiga ega qilishga yo‘naltirilgan innovatsion loyiha sifatida e’tirof etilmoqda. Maktabning asosiy maqsadi ishsiz va kam ta’minlangan fuqarolarni tomorqachilikka o‘rgatish, ularga yuqori daromad keltiruvchi texnologiyalarni amalda ko‘rsatishdir.
Shu maqsadda Termiz, Muzrabot, Qiziriq, Bandixon, Angor va Jarqo‘rg‘on tumanlarida faoliyat olib borilmoqda. Maktab tarkibida uch gektar issiqxona va uch gektar o‘quv-tajriba maydoni mavjud.
Bu yerda banan, papayya, lavanda, limon, brokkoli kabi ekinlar yetishtirilmoqda. Tomchilatib sug‘orish tizimi joriy etilgan, bu esa suvdan samarali foydalanishga imkon beradi.
Loyihada hozirga qadar 1300 nafarga yaqin fuqaro maxsus kurslarni tamomlagan. Tinglovchilarga bir sotix yerdan o‘rtacha 10–15 million so‘m daromad olish metodikasi o‘rgatilmoqda.
“Agrostar” kompaniyalari esa tinglovchilarni urug‘ va ko‘chat bilan ta’minlab, yetishtirilgan mahsulotni xarid qilishni yo‘lga qo‘ygan. Bu tizim nafaqat nazariy bilim, balki amaliyotga asoslangan iqtisodiy model sifatida ishlamoqda.
Prezident tashrif davomida sanoatlashgan bog‘lar, suv tejash texnologiyalari va meva-sabzavotni qayta ishlash loyihalari bilan tanishdi. Shuningdek, eksport imkoniyatlarini kengaytirish, yangi ekin turlarini o‘zlashtirish va qo‘shilgan qiymat yaratish bo‘yicha tadbirkorlar bilan muloqot qildi.
Ushbu loyiha aholi daromadini oshirish, ishsizlikni kamaytirish va qishloq xo‘jaligida yangi madaniyatni shakllantirishga qaratilgan amaliy model sifatida e’tirof etilmoqda. Ma’lumotlar prezidentning rasmiy saytida berilgan (manba: zamin.uz).
