Samarqand, Buxoro va Xiva Osiyoning eng go‘zal shaharlari orasida
O‘zbekistonning uch shahri – Samarqand, Buxoro va Xiva – xalqaro miqyosda e’tirof etilib, Osiyoning eng go‘zal 30 shahri ro‘yxatiga kiritildi. Bu haqda Zamin.uz xabar berdi.
Ushbu ro‘yxat Polshada chop etiladigan “National Geographic Traveler” jurnalining maxsus sonida e’lon qilingan. Maqola muallifi, jurnalist Agneshka Franus O‘zbekistonning boy tarixiy merosi va Buyuk Ipak yo‘li shaharlarining o‘ziga xos me’moriy jozibasini alohida ta’kidlagan.
Jumladan, Samarqanddagi Registon ansambli, Shohi-Zinda majmuasi, Bibixonim masjidi va Amir Temur maqbarasi dunyoning eng nodir yodgorliklari sifatida keltirilgan. Buxoro shahrida joylashgan Ark qal’asi va qadimiy madrasalar shaharning uzoq tarixiy davlatchilik an’analarini aks ettiradi.
Xiva shahri esa Ichan-qal’a majmuasi bilan dunyo bo‘ylab mashhur bo‘lib, ochiq osmon ostidagi muzey sifatida yuqori baholangan. Bundan tashqari, maqolada O‘zbekistondagi sayyohlik infratuzilmasi ham e’tirof etilgan.
Xavfsizlik darajasi, transport qulayliklari, xizmatlar sifati va narxlarning mosligi mamlakatni sayohat qilish uchun qulay manzilga aylantirgani qayd etilgan. Shuningdek, mahalliy aholining mehmondo‘stligi va samimiyligi ham alohida ta’kidlangan.
