Samarqand, Buxoro va Xiva Osiyoning eng go'zal shaharlari safida
O‘zbekistonning uch shahri — Samarqand, Buxoro va Xiva — xalqaro miqyosda e'tirofga sazovor bo‘ldi. Bu haqda Zamin.uz xabar berdi.
Polshada chop etiladigan “National Geographic Traveler” jurnali bu shaharlarni Osiyoning eng go‘zal 30 shahri qatoriga kiritdi. Jurnalist Agneshka Franus maqolasida O‘zbekistonning boy tarixiy merosi va Buyuk Ipak yo‘li shaharlarining me’moriy jozibasiga alohida e'tibor qaratgan.
Samarqandda joylashgan Registon ansambli, Shohi-Zinda, Bibixonim masjidi va Amir Temur maqbarasi dunyo durdonalari sifatida qayd etilgan. Buxorodagi Ark qal’asi va qadimiy madrasalar shaharning boy tarixini namoyon etsa, Xivadagi Ichan-qal’a majmuasi ochiq osmon ostidagi muzey sifatida yuqori baholangan.
Jurnal shuningdek, sayyohlar uchun yaratilgan sharoitlarni ham e'tirof etgan. Xavfsizlik, transport infratuzilmasi, xizmatlar sifati va narxlar mutanosibligi O‘zbekistonni mustaqil sayohat uchun qulay manzilga aylantirgani qayd etilgan.
Mahalliy aholining mehmondo‘stligi ham maqolada alohida ta’kidlangan. Ma’lumot manbasi: National Geographic Traveler jurnali.
