Prezident Mirziyoyev "Yangi O‘zbekiston" massivini ko‘zdan kechirdi
Prezident Shavkat Mirziyoyev Surxondaryo viloyatining Jarqo‘rg‘on tumanida qurilayotgan "Yangi O‘zbekiston" massivini borib ko‘rdi. Bu haqda Zamin.uz xabar berdi.
Ushbu loyiha mamlakatimizda aholiga munosib yashash sharoitlarini yaratish maqsadida amalga oshirilmoqda. 2021 yil 12 oktyabrdagi farmonga binoan, "Yangi O‘zbekiston" massivlari qurilishi va hududlarni ijtimoiy-iqtisodiy rivojlantirish chora-tadbirlari belgilangan.
Jarqo‘rg‘onda zamonaviy shaharsozlik talablari asosida 50 gektar maydonda 116 ta ko‘p qavatli uy qurilishi rejalashtirilgan. Hozirda poliklinika, 180 o‘rinli bog‘cha, 330 o‘rinli maktab va mahalla binosi foydalanishga topshirildi.
68 ta uydagi 1,5 mingta xonadonga aholi ko‘chib kirdi. Shuningdek, axborot texnologiyalari va ingliz tili o‘quv markazi ish boshlagan, 7 ta mikromarkaz va 5 ta savdo va maishiy xizmat obyekti qurilgan.
Ichimlik suvi, issiqlik tarmoqlari va gaz quvurlari tortilib, transformatorlar o‘rnatilgan. Yashil maydonlar va saksovul ekish ishlari ham amalga oshirilgan.
Kelgusida yana 50 ga yaqin uy qurilishi ko‘zda tutilgan. Joriy yilda 14 ta ko‘p qavatli uy-joy, yangi yo‘llar va istirohat bog‘i qurilishi rejalashtirilgan.
Davlatimiz rahbari massivdagi 66-maktabda yaratilgan shart-sharoitlar, nogironligi bo‘lgan bolalar uchun tashkil etilgan imkoniyatlar bilan tanishdi. Maktabda 500 dan ziyod o‘quvchi ta’lim olmoqda, maxsus mutaxassislar faoliyat yuritmoqda.
Prezidentimiz sun’iy intellekt va raqamlashtirishning yoshlar hayotidagi ahamiyatiga e’tibor qaratdi.
