Qatar havo hududi yopildi, 48 o‘zbekistonlik Doha aeroportida qoldi
O‘zbekistonning Qatardagi elchixonasi ma’lum qilishicha, Qatar havo hududi vaqtincha yopilgani sababli Toshkentga qaytishi kerak bo‘lgan 48 nafar fuqaro Doha shahridagi Hamad xalqaro aeroportida qolib ketgan. Bu haqda Zamin.uz xabar berdi.
Ushbu holat aviareyslar vaqtincha to‘xtatilgani tufayli yuzaga kelib, yo‘lovchilarni joylashtirishda muammolar paydo bo‘lgan. Elchixona xodimlari darhol vaziyatga aralashib, fuqarolarni vaqtinchalik mehmonxonalarga joylashtirishni tashkil qilishga muvaffaq bo‘lishdi.
Ma’lum qilinishicha, Qatar havo hududi qayta ochilgach, fuqarolarimizning vatanga xavfsiz qaytishi ta’minlanadi. Elchixona vaziyatni nazorat qilib, fuqarolarimizdan vahimaga tushmasliklarini va faqat rasmiy manbalarga tayanishlarini so‘ramoqda.
Ushbu vaziyatda elchixonaning tezkor va samarali harakatlari fuqarolarimizning xavfsizligini ta’minlashga qaratilgan. Manba: One.uz.
