Prezident Mirziyoyev Eronga ta’ziya maktubi yo‘lladi
O‘zbekiston Respublikasi Prezidenti Shavkat Mirziyoyev Eron Islom Respublikasi Prezidenti Mas’ud Pezeshkiyonga ta’ziya maktubi yo‘lladi. Bu haqda Zamin.uz xabar berdi.
Ushbu maktubda Eronning Oliy diniy rahbari Oyatulloh Sayyid Ali Xomanaiyning vafoti munosabati bilan chuqur hamdardlik bildirildi. Prezident Mirziyoyev bu noxush xabarni katta iztirob bilan qabul qilganini ta’kidlab, marhumning ko‘p yillik samarali faoliyatini yuksak baholadi.
Xomanaiy Eron davlatchiligini mustahkamlash, jamiyat barqarorligini ta’minlash va milliy qadriyatlarni asrab-avaylash yo‘lida katta xizmatlar qilganini qayd etdi. Shuningdek, Xomanaiy O‘zbekiston va Eron o‘rtasidagi hamkorlikni rivojlantirishga katta hissa qo‘shgani alohida ta’kidlandi.
Uning yorqin xotirasi xalqlar qalbida doimo saqlanib qolishi aytildi. Prezident Mirziyoyev Eron rahbariyati va xalqiga samimiy hamdardlik bildirdi.
Allohdan marhumning ruhini o‘z rahmatiga olishini, oila a’zolariga sabr-toqat ato etishini so‘radi. Ushbu maktub Eronning O‘zbekistondagi elchixonasi veb-saytida e’lon qilindi.
