"Ko‘mak" dasturi yoshlar uchun yangi imkoniyatlar yaratmoqda
Bugungi kunda "Ko‘mak" dasturi chekka va olis hududlarda yoshlar uchun yangi imkoniyatlarni kengaytirmoqda. Bu haqda Zamin.uz xabar berdi.
Ushbu dastur doirasida 130 million so‘mgacha bo‘lgan foizsiz ssuda ajratilishi tufayli, so‘nggi olti oy ichida chet tilini o‘rgatadigan 120 dan ortiq o‘quv markazi ish boshladi. Bu markazlarni yo‘lga qo‘ygan yosh tadbirkorlar amaliy tajriba to‘plab, endi yanada katta tashabbuslar bilan chiqmoqdalar.
Ular IT va zamonaviy kasblar markazlari, kutubxonalar, sport to‘garaklari kabi qo‘shimcha yo‘nalishlarni ochishni taklif qilishmoqda. Bu faqat til masalasi emas, balki butun boshli "rivojlanish muhiti"ni yaratishga qaratilgan.
"Ko‘mak" loyihasi orqali o‘z biznesini boshlagan va yaxshi natijalar ko‘rsatayotgan yoshlar uchun 300 million so‘mgacha foizsiz ssuda berish tizimi yo‘lga qo‘yiladi. Bu esa muvaffaqiyatli loyihalarni yanada yuqori darajaga olib chiqish uchun "ikkinchi nafas" vazifasini bajaradi.
Soliqlarda ham yengilliklar mavjud. Olis hududlardagi o‘quv markazlari ijtimoiy soliqni 1 foiz miqdorida to‘laydi, o‘qituvchilarning daromad solig‘i esa 7,5 foiz qilib belgilangan.
Bu esa markazlar va o‘qituvchilarga yanada qulay sharoit yaratadi. Yoshlar ishlari agentligiga xususiy o‘quv markazlari bilan hamkorlikda yiliga 20 ming nafar yoshni kelajak kasblariga o‘qitish vazifasi yuklatilgan.
Shuningdek, har bir tumanga 500 million so‘mgacha ssuda ajratilib, texnikum va o‘quv markazlarida kasb-hunar laboratoriyalari tashkil etilishi topshirildi. Umuman olganda, "Ko‘mak" dasturi chekka hududlarda ham til, IT va zamonaviy kasblarni rivojlantirishga xizmat qilmoqda.
Endi asosiy vazifa — bu markazlarning barqaror ishlashi va yoshlarga haqiqiy natijalar berishidir.
