Yosh tadbirkorlar uchun moliyaviy qo'llab-quvvatlash kengaymoqda
O'zbekistonda yoshlar uchun yangi imkoniyatlar eshigi ochilmoqda. Bu haqda Zamin.uz xabar berdi.
"Kelajak tadbirkori" dasturi ishga tushirilib, yosh tadbirkorlarga 7 yil muddatgacha 15 foizlik moliyalashtirish ajratilishi boshlanadi. Shuningdek, oliygoh bitiruvchilari uchun "Mening birinchi kasbim" stajirovka dasturi va hududlarda "Yoshlar biznes inkubatori" markazlarini tashkil etish rejalashtirilgan.
"Kelajak tadbirkori" doirasida yoshlar uchun kreditlar yo'nalishga qarab bosqichma-bosqich beriladi. O'zini o'zi band qilgan yoshlarga garovsiz 20 million so'mgacha kredit, yangi biznes boshlayotganlarga 300 million so'mgacha, ishini kengaytirmoqchi bo'lgan yosh tadbirkorlarga 2 milliard so'mgacha, kamida 5 nafar bitiruvchini ishga olgan tadbirkorlarga 10 milliard so'mgacha kredit ajratilishi ko'zda tutilgan.
"Mening birinchi kasbim" dasturi yoshlarning mehnat bozoriga kirib borishini osonlashtirish maqsadida Oliy ta'lim, fan va innovatsiyalar vazirligi bilan hamkorlikda ishga tushiriladi. Stajirovka asosida oliygoh bitiruvchilari o'rtasida tanlov o'tkazilib, g'oliblarga oyiga 2 million so'mgacha stipendiya to'lab beriladi.
Biznes inkubatorlarning tashkil etilishi esa yosh tadbirkorlikka ko'mak beradi. Tadqiqotlar shuni ko'rsatdiki, yoshlarning taxminan 30 foizi biznes ko'nikmasi yetishmasligi sababli qiyinchilikka duch kelmoqda.
Shu sababli, har bir hududda "Yoshlar biznes inkubatori" ishga tushirilishi belgilandi. Bu markazlar yoshlarga tadbirkorlikka o'qitish, g'oyalarni biznesga aylantirish, buxgalteriya va bank masalalari, marketing, ichki va tashqi bozorga chiqish kabi yo'nalishlarda xizmat ko'rsatadi.
Bu yil Qoraqalpog'iston, Jizzax, Namangan, Surxondaryo, Xorazm va Toshkent shahrida inkubatorlar ochilishi rejalashtirilgan. Kelayotgan yillarda esa qolgan hududlarda shunday markazlar tashkil etilishi ko'zda tutilgan.
Endi yoshlar "pul topish qiyin" deb to'xtab qolmasligi kerak, kredit, stajirovka va inkubatorlar orqali yo'l ochiq. Eng asosiysi, bu imkoniyatlardan to'g'ri foydalanish yoshlar qo'lida.
Ma'lumot manbasi: One.uz.
