O‘zbekistonda payshanba kuni "Yoshlar kuni" belgilandi
O‘zbekistonda har haftaning payshanba kuni rasmiy ravishda "Yoshlar kuni" deb e’lon qilindi. Bu haqda Zamin.uz xabar berdi.
Bu tashabbus mamlakatdagi vazirliklar, idoralar va hokimliklarda yoshlarni qo‘llab-quvvatlash, ularning muammolarini hal etishga yordam berish maqsadida amalga oshirilmoqda. Har payshanba kuni sohaviy rahbarlar mahalla, maktab va texnikumlarga tashrif buyurib, yoshlar bilan muloqot qiladi.
Ular yoshlarning fikr va takliflarini tinglab, kundalik hayotdagi muammolarini hal etishga ko‘maklashadi. Hokimlar va mas’ul rahbarlar yoshlar uchun turli qo‘llab-quvvatlovchi tadbirlar tashkil etadi.
Bu tadbirlarda yoshlarning ta’lim olishi, sport bilan shug‘ullanishi, kasb va xorijiy tillarni o‘rganishi uchun imkoniyatlar yaratiladi. Ishga joylashish va tadbirkorlik faoliyati bilan shug‘ullanish istagidagi yoshlar ham e’tiborsiz qolmaydi.
Shuningdek, startapchi yoshlar uchun uchrashuvlar o‘tkazilib, ularga maxsus grantlar va moliyaviy yordam ko‘rsatiladi. Bu kuni eng yaxshi tomorqachi, fermer, sanoatchi, startapchi, ijodkor va ma’naviyat sohasida faoliyat yuritayotgan yoshlar uchun qiziqarli tanlovlar, ko‘rgazmalar va yarmarkalar tashkil qilinadi.
Bu tadbirlar yoshlarning ijodiy salohiyatini oshirishga, yangi g‘oyalar va loyihalarni rivojlantirishga katta imkoniyat yaratadi. "Yoshlar kuni" yoshlar bilan muloqotni kuchaytirish, ularning ijodiy va mehnat salohiyatini qo‘llab-quvvatlash hamda yangi iqtidorlarni kashf etishda muhim rol o‘ynaydi.
Manba: One.uz
