O‘zbekiston fuqarolari uchun vizasiz davlatlar soni oshadi
O‘zbekiston kelgusi besh yil ichida fuqarolari vizasiz kirishi mumkin bo‘lgan davlatlar sonini oshirishni maqsad qilmoqda. Bu haqda Zamin.uz xabar berdi.
Bu maqsad 2026 yil 16 fevralda tasdiqlangan “O‘zbekiston – 2030” strategiyasida belgilangan. Ushbu strategiyaga ko‘ra, hozirda O‘zbekiston fuqarolari 34 ta davlatga vizasiz bora oladi.
2026 yilda bu raqam 36 taga yetkaziladi, 2027 yilda esa 38 ta davlatga oshiriladi. 2028 yilga kelib 42 ta davlatga, 2029 yilda 46 ta davlatga va 2030 yilga kelib esa 50 ta davlatga yetkazilishi rejalashtirilgan.
Hozirda 42 ta davlatga soddalashtirilgan viza tartibi amal qilmoqda va bu raqam 2030 yilga qadar 60 taga yetkazilishi ko‘zda tutilgan. Shuningdek, konsullik xizmatlari uchun maxsus mobil platforma ishlab chiqilishi va bu platforma foydalanuvchilar sonini 60 mingtagacha oshirish rejalashtirilmoqda.
Ma’lumot uchun, 2025 yilda Xitoy va Iordaniyaga vizasiz kirish rejimi joriy etilgan edi. Ushbu chora-tadbirlar O‘zbekiston fuqarolarining xorijga sayohat qilishini yanada osonlashtiradi.
