P2P o‘tkazmalarning yarmidan ko‘pi kichik summalarda amalga oshirilgan
Markaziy bank 2025 yil uchun P2P (kartadan kartaga) o‘tkazmalar bo‘yicha tahliliy statistik ma’lumotlarni e’lon qildi. Bu haqda Zamin.uz xabar berdi.
Ma’lum bo‘lishicha, o‘tgan yil davomida karta orqali amalga oshirilgan o‘tkazmalarning aksariyati kundalik hisob-kitoblar, mayda to‘lovlar va odamlar o‘rtasidagi oddiy pul almashinuvi uchun ishlatilgan. Qiziqarli jihati shundaki, umumiy tranzaksiyalarning yarmidan ko‘pi kichik summalarga to‘g‘ri kelgan.
Aniqroq aytsak, barcha o‘tkazmalarning 46,1 foizi 1 million so‘mgacha bo‘lgan operatsiyalarni tashkil etgan. Ya’ni, yil davomida har ikkinchi o‘tkazma katta pul emas, balki odatiy, kundalik ehtiyojlar uchun yuborilgan.
Statistikada keyingi toifalar ham e’tiborga molik. 1–5 million so‘m oralig‘idagi P2P o‘tkazmalar ulushi 16,8 foizni tashkil etgan bo‘lsa, 5–10 million so‘m atrofidagi o‘tkazmalar 8,6 foizni tashkil qilgan.
Kattaroq summalarga kelsak, 10 million so‘mdan 50 million so‘mgacha bo‘lgan o‘tkazmalarning ulushi 18,3 foizni tashkil etgan. 50–100 million so‘m diapazonidagi o‘tkazmalar 5,4 foizni, 100–200 million so‘m oralig‘idagilar esa 3,2 foizni tashkil etgan.
200–500 million so‘m atrofidagi P2P o‘tkazmalar 1,4 foiz ulush bilan qayd etilgan. Eng yuqori segmentdagi operatsiyalar esa kam: jami o‘tkazmalarning 0,2 foizi 500 million so‘mdan ortiq summalarga to‘g‘ri kelgan.
Umuman olganda, 2025 yilgi raqamlar P2P o‘tkazmalarning asosiy qismi kundalik hayotda pul aylanmasi ekanini ko‘rsatmoqda. Odamlar ko‘proq mayda va o‘rta summadagi to‘lovlarni karta orqali tez va qulay usulda amalga oshirganlar.
