Toshkentda avtobus bekatlari atrofidagi savdo nuqtalari olib tashlanadi
Toshkent shahrida avtobus bekatlari atrofidagi savdo nuqtalari olib tashlanadi. Bu haqda Zamin.uz xabar berdi.
Shahar hokimligi bu qarorni xalqaro tajriba asosida qabul qilgan. Zamonaviy bekat konsepsiyasiga ko‘ra, bekat hududida savdo obyektlari bo‘lmasligi kerak, chunki yo‘lovchilar transportni erkin va xavfsiz kutishlari, platformalar keng bo‘lishi, tirbandlik kuchayganda ularni kengaytirish imkoniyati saqlanishi va inklyuziv muhit yaratilishi lozim.
Poytaxtdagi jamoat transporti infratuzilmasi bo‘yicha keng ko‘lamli xatlov o‘tkazilgan. Birinchi bosqichda 100 km masofa qamrab olinib, 360 dan ortiq bekat hamda 190 ta katta-kichik chorraha ko‘rikdan o‘tkazilgan.
Audit natijalariga ko‘ra, bekatlar o‘rnida 110 ta savdo obyekti joylashgani aniqlangan. Ulardan 61 tasi bekat majmuasi hududiga egalik qilish yoki uni tasarruf etish huquqini tasdiqlovchi hujjatlarni taqdim eta olmagan.
Endi ularning faoliyatiga huquqiy baho berilib, tegishli choralar ko‘rilishi aytilmoqda. Shahar ma’muriyatining qarori asosida barcha bekatlar yangilanishi rejalashtirilgan.
Ruxsat beruvchi hujjatlarga ega tadbirkorlar uchun savdo nuqtalarini ko‘chirish maqsadida boshqa joy ajratish va kompensatsiya to‘lash mexanizmi ham ko‘zda tutilgan. Bekatlar endi haqiqiy jamoat transporti uchun qulay va xavfsiz maydonga aylantirilishi kutilmoqda.
