O‘zbekistonda mart oyi boshida sovuq havo kutilmoqda
O‘zbekiston hududiga 9-martdan 12-martgacha sovuq va nam havo oqimlari kirib kelishi kutilmoqda. Bu haqda Zamin.uz xabar berdi.
Sinoptiklarning ma’lumotiga ko‘ra, bu kunlarda ob-havo keskin o‘zgaradi. Xususan, 9-martdan 11-martgacha yomg‘ir yog‘ishi va ayrim joylarda qorga aylanishi mumkin.
Ayniqsa, tog‘li va tog‘ oldi hududlarda kuchli yog‘ingarchilik kuzatilishi ehtimoli bor. Shuningdek, shamol tezligi oshib, ayrim hududlarda sekundiga 15-20 metrga, ba’zi joylarda esa 22-25 metrgacha yetishi mumkin.
Bu esa aholining ehtiyotkor bo‘lishini talab qiladi. Havo harorati 10-martdan 12-martgacha sezilarli pasayadi.
Shimoliy hududlarda kechalari 7-10 daraja sovuq, kunduzi esa 0-3 daraja sovuq bo‘lishi kutilmoqda. Qolgan hududlarda 11-mart va 12-mart kunlari kechasi 0-3 daraja sovuq, kunduzi esa 2-5 daraja iliq bo‘lishi mumkin.
Fuqarolardan ob-havo o‘zgarishlarini inobatga olib, harakatlanish va kiyinishda ehtiyotkor bo‘lish so‘raladi. Ma’lumot manbasi: One.uz.
