O‘zbekistonda palov narxlari hududlarga qarab farqlanadi
Milliy statistika qo‘mitasi 2026-yil fevral oyi uchun O‘zbekiston hududlarida 1 kilogramm palov tayyorlash qiymatini aniqladi. Bu haqda Zamin.uz xabar berdi.
Hisob-kitoblarga ko‘ra, palov tayyorlash narxi hududlarga qarab farq qiladi. Ba’zi viloyatlarda bu narx arzonroq bo‘lsa, boshqalarida qimmatroq ekani kuzatilgan.
Ma’lumotlarga ko‘ra, eng arzon palov Qoraqalpog‘iston Respublikasida tayyorlanadi va uning qiymati 98 927 so‘mni tashkil etadi. Sirdaryo viloyatida bu narx 105 337 so‘m, Andijon viloyatida esa 106 984 so‘mni tashkil qiladi.
Eng yuqori qiymat Toshkent shahrida qayd etilgan bo‘lib, bu yerda 1 kilogramm palov tayyorlash 118 381 so‘mga tushadi. Farg‘ona viloyatida palov narxi 116 256 so‘m, Samarqandda 114 383 so‘m, Toshkent viloyatida esa 113 602 so‘mni tashkil etadi.
Ushbu hisob-kitobda palov tayyorlash uchun zarur bo‘lgan asosiy mahsulotlar, jumladan, 0,3 litr kungaboqar yog‘i, 300 gramm piyoz, 700 gramm mol go‘shti, 1 kilogramm sabzi, 1 kilogramm guruch, 100 gramm no‘xat, 10 gramm zira va 20 gramm tuz hisobga olingan. Mutaxassislar bu qiymatlar tayyor palovning bozordagi narxini aks ettirmasligini ta’kidlashmoqda, chunki oshxonalarda palov narxiga tayyorlash xarajatlari va xizmat haqi ham qo‘shiladi.
