O'zbekiston startap ekotizimi jahon reytingida kuchli 100 talikda
O'zbekistonning startap va venchur ekotizimi tez sur'atlarda rivojlanishda davom etmoqda. Bu haqda Zamin.uz xabar berdi.
IT Park Ventures jamg'armasi ma'lumotlariga ko'ra, o'tgan yil davomida mamlakatda startap muhiti 132 foizdan ortiq o'sishga erishgan. Bu yutuq natijasida O'zbekiston ilk bor StartupBlink Global Startup Ecosystem Index reytingida kuchli 100 talik orasidan o'rin oldi.
Venchur bitimlarining hajmi ham sezilarli darajada oshdi. 2024 yilda bu ko'rsatkich 69,5 million dollarni tashkil qilgan bo'lsa, 2025 yilda sarmoyalar hajmi 329 million dollardan oshib ketdi.
IT Park Ventures jamg'armasi 10 million dollar kapital bilan faoliyatini boshlagan bo'lib, bir yil ichida 500 dan ortiq loyihani saralab oldi. Hozirgi kunda jamg'arma portfelida 15 ta davlatda faoliyat yuritayotgan 70 ga yaqin startap mavjud.
Investitsiyalarning asosiy qismi, ya'ni 25 foizi FinTech sohasiga yo'naltirilgan. Shuningdek, EdTech, HR Tech, SaaS hamda sun'iy intellekt yo'nalishlari ham investorlar diqqat markazida.
Loyihalar 500 Global va Plug and Play kabi xalqaro hamkorlar bilan birgalikda moliyalashtirilgan. 2026 yilda jamg'arma o'z faoliyatini yanada kengaytirishni rejalashtirmoqda.
Kelgusi yilda sun'iy intellekt, GameDev va boshqa texnologik yo'nalishlarga ustuvorlik berilishi ko'zda tutilgan. Shuningdek, xalqaro hamkorlar bilan birgalikda yangi venchur jamg'armalarini tashkil etish va startaplarning global bozorga chiqishiga ko'maklashish rejalashtirilgan.
