O‘zbekistonning tog‘li hududlarida sel xavfi e’lon qilindi
O‘zgidromet mutaxassislari 7, 9 va 10 mart kunlari kutilayotgan yog‘ingarchiliklar tufayli O‘zbekistonning tog‘ oldi va tog‘li hududlarida sel va suv toshqinlari yuzaga kelishi mumkinligi haqida ogohlantirdi. Bu haqda Zamin.uz xabar berdi.
Xavf asosan Qashqadaryo, Surxondaryo, Samarqand, Navoiy, Jizzax, Toshkent, Namangan, Farg‘ona va Andijon viloyatlarining ayrim tumanlariga tegishli. Ushbu hududlarda yashovchi aholi, tog‘li hududlarda dam olayotgan fuqarolar va haydovchilardan ehtiyotkorlik choralarini ko‘rish so‘ralmoqda.
Kuchli yomg‘irlar oqibatida suv to‘planishi va yo‘llarni suv bosishi ehtimoli yuqori. 4 va 5 mart kunlari kuzatilgan yog‘ingarchiliklar ham ayrim soylarda suv sathining ko‘tarilishiga va yo‘llarda suv yig‘ilib qolishiga sabab bo‘lgan edi.
O‘sha vaqtda Favqulodda vaziyatlar vazirligi xodimlari barcha noxush holatlarni tezkorlik bilan bartaraf etgan edi. Mutaxassislar tog‘li hududlarda harakatlanayotgan fuqarolarni ob-havo ma’lumotlarini kuzatib borishga va xavfsizlik qoidalariga qat’iy rioya qilishga chaqirmoqda.
Sel xavfi mavjud hududlarda yashovchi aholi esa o‘z xonadonlari va yaqinlari xavfsizligini ta’minlash bo‘yicha zarur choralarni ko‘rishi tavsiya etiladi. Ma’lumot one.uz saytida keltirilgan.
