Prezident zo‘ravonlikka qarshi yangi farmon imzoladi
Prezidentimiz o‘tkazilgan tadbirda ayollar va bolalarga nisbatan tazyiq hamda zo‘ravonlikka qarshi murosasiz muhit yaratish muhim vazifa ekanligini ta’kidladi. Bu haqda Zamin.uz xabar berdi.
Davlat rahbari bu borada yangi farmon imzolanganini e’lon qildi va zo‘ravonlikka qarshi qat’iy tizim asosida kurash olib borilishini ma’lum qildi. Bundan tashqari, jinoyatga qo‘l urgan ayollarni ijtimoiy hayotga qaytarish masalasiga ham e’tibor qaratildi.
Ko‘plab ayollar kasbiy ko‘nikmalarga ega emasligi sababli, ular uchun maxsus "Yangi hayot" dasturi tashkil etiladi. Ushbu dastur doirasida ayollar 3-6 oy mobaynida kasbga o‘qitilib, sertifikatlarga ega bo‘lishadi.
Shuningdek, jazoni ijro etish muassasalarida saqlanayotgan ayollarga oliy ta’lim olish imkoniyati yaratiladi. Ular muassasada imtihon topshirib, masofaviy ta’lim orqali o‘qishlari mumkin.
Kontrakt to‘lovlarini amalga oshirish uchun esa, ishga joylashgandan so‘ng qaytarish sharti bilan foizsiz ssudalar ajratilishi rejalashtirilgan. Bu chora-tadbirlar ayollarning jamiyatga to‘laqonli a’zo sifatida qayta kirib kelishiga yordam beradi.
