O‘zbekistonda xotin-qizlar uchun ta’lim imtiyozlari kengaymoqda
O‘zbekistonda yangi o‘quv yilidan boshlab xotin-qizlarning ta’lim olishlari va ilmiy izlanishlarini qo‘llab-quvvatlash maqsadida bir qator imtiyozlar joriy etilmoqda. Bu haqda Zamin.uz xabar berdi.
Avvalo, ehtiyojmand oilalardagi xotin-qizlar uchun ajratiladigan davlat granti kvotasi ikki barobarga oshirilib, 4 mingta etib belgilandi. Bu yangilik minglab yoshlarning oliy ta’lim olish imkoniyatini kengaytiradi.
Shuningdek, xalqaro reytingda yuqori o‘rinlarni egallagan 300 talik oliygohlar bilan hamkorlikda magistratura bosqichida o‘qiyotgan qizlarning kontrakt to‘lovlari davlat tomonidan to‘lanadi. Bu qadam iqtidorli yoshlarning xalqaro standartlar asosida bilim olishiga katta imkoniyat yaratadi.
Shu bilan birga, maktabni tamomlab, davlat texnikumlariga o‘qishga kirgan qizlarning kasb egallashi to‘liq davlat granti asosida amalga oshiriladi. Bu orqali yoshlarning mehnat bozorida muvaffaqiyatli faoliyat yuritishi va malakali mutaxassis bo‘lib yetishishi maqsad qilingan.
Xotin-qizlarning innovatsion g‘oyalarini qo‘llab-quvvatlash uchun esa har yili kamida 10 ta yo‘nalish bo‘yicha startap tanlovlari o‘tkaziladi. Har bir yo‘nalish g‘olibiga Innovatsiya jamg‘armasi tomonidan 500 million so‘mgacha grant mablag‘lari ajratilishi belgilangan.
