O‘zbekistonga sovuq antisiklon kirib kelmoqda
Bugun, 7 mart kuni O‘zbekiston hududiga sovuq antisiklon kirib kelmoqda, deb xabar berdi O‘zgidromet. Bu haqda Zamin.uz xabar berdi.
Sovuq havo oqimining kirib kelishi bilan atmosferadagi havo sifati yomonlashishi mumkinligi aytilmoqda. Havo harakatining sekinlashuvi va harorat inversiyasi tufayli ifloslantiruvchi moddalar yerga yaqin qatlamda to‘planib borishi ehtimoli mavjud.
Shu kunlarda hududda harorat inversiyasini keltirib chiqaruvchi meteorologik sharoitlar kuzatilmoqda. Kechasi havo harorati 5–7 daraja, kunduzi esa 16–18 daraja iliq bo‘lib, keskin harorat tafovuti yuzaga kelmoqda.
Toshkent shahrida esa nam va nisbatan salqin havo massasi hukm surmoqda. Ertalabki soatlarda tuman, yuqori namlik va deyarli shamolsiz ob-havo kuzatilmoqda, bu esa havo almashinuvining juda sust kechishiga sabab bo‘lmoqda.
Natijada chiqindilar shaharda saqlanib qolishi mumkin. Atmosferada shaharga xos odatiy ifloslantiruvchi moddalar, asosan, avtotransport, isitish tizimlari, yoqilg‘i yoqilishi va sanoat chiqindilari hisobidan to‘planishi qayd etilmoqda.
Bunday sharoitda ifloslantiruvchi moddalarning tarqalishi qiyinlashadi va havoda chang hamda mayda dispersli zarrachalar miqdori ortishi mumkin. Mutaxassislar fikricha, bunday holat yaqin uch kun davomida saqlanishi kutilmoqda.
10 martga borib, sovuq antisiklon mamlakat hududini to‘liq qamrab oladi, havo harorati barqarorlashib, shamol tezligi oshishi va yog‘ingarchilik kuzatilishi natijasida atmosferadagi ifloslantiruvchi moddalar tarqalishi mumkin.
