Yaqin Sharqdan O‘zbekistonga 19 ming fuqaro qaytarildi
O‘zbekiston Respublikasi Tashqi ishlar vazirligining ma’lumotiga ko‘ra, 8 mart kuni ertalab soat 07:00 holatiga ko‘ra Yaqin Sharq davlatlaridan O‘zbekistonga qaytarilgan fuqarolar soni 19 347 nafarga yetdi. Bu haqda Zamin.uz xabar berdi.
7 mart kuni Saudiya Arabistonidan 9 ta reys orqali 1 680 nafar, Birlashgan Arab Amirliklaridan 2 ta reys bilan 394 nafar fuqaro vatanga olib kelingan. Shuningdek, Erondan ham 5 nafar O‘zbekiston fuqarosi qaytarildi.
Qatar va Saudiya Arabistonidagi O‘zbekiston elchixonalari Transport vazirligi bilan hamkorlikda Dohada bo‘lib turgan 208 nafar vatandoshni evakuatsiya qildi. Ular Centrum Air reysi bilan Ar-Riyoddan uchib, 8 mart kuni soat 05:40 da Toshkentga sog‘-salomat yetib kelishdi.
Hozirda keyingi evakuatsiya bosqichi uchun fuqarolarning ikkinchi guruhi — 126 nafar vatandosh ham shakllantirilgan. Ularni Doha shahridan Riyod orqali Toshkentga charter reys bilan olib kelish rejalashtirilgan.
Ma’lum qilinishicha, vatandoshlarni qaytarish ishlari tizimli va bosqichma-bosqich davom ettirilmoqda. Bu jarayonning barchasi Tashqi ishlar vazirligi tomonidan nazorat qilinmoqda.
