Yaqin Sharqdagi O‘zbekistonlik sayyohlarga maxsus Telegram-bot ishga tushdi
Yaqin Sharq davlatlariga sayyohlik maqsadida turoperator yoki turagentlar orqali borgan O‘zbekiston fuqarolari uchun maxsus Telegram-bot ishga tushirildi. Bu haqda Zamin.uz xabar berdi.
Bu haqda O‘zbekiston Respublikasi Turizm qo‘mitasining axborot xizmati ma’lum qildi. @tourism_murojaat_bot nomli bot fuqarolarning noqulay yoki murakkab vaziyatga tushib qolishining oldini olish maqsadida yaratildi.
Ushbu bot orqali sayyohlar yoki ularning yaqin qarindoshlari kerakli ma’lumotlarni kiritib, Turizm qo‘mitasiga murojaat qilishlari mumkin. Ta’kidlanishicha, kelib tushgan murojaatlar asosida birinchi navbatda fuqarolarni O‘zbekistonga qaytarish uchun zarur choralar ko‘riladi.
Bu esa chet elda qolib ketgan vatandoshlar haqida tezkor ma’lumot olish va ularga amaliy yordam ko‘rsatish imkonini beradi. Shuningdek, bot orqali murojaat qilayotgan fuqarolardan aniq va to‘liq ma’lumot berish so‘ralmoqda.
Mas’ullar bunday ma’lumotlar murojaatlarni tezda ko‘rib chiqish hamda zarur yordamni o‘z vaqtida tashkil etishda muhim ahamiyatga ega ekanini ta’kidlamoqda.
