O‘zbekiston Ramazon hayiti munosabati bilan Afg‘onistonga yordam berdi
Bugun, 18-mart kuni O‘zbekiston nomidan birodar Afg‘oniston xalqiga insonparvarlik yordami ko‘rsatildi. Bu haqda Zamin.uz xabar berdi.
Ushbu yordam Ramazon hayiti munosabati bilan amalga oshirildi va ikki davlat o‘rtasidagi yaqin qo‘shnichilik hamda do‘stlik aloqalarini mustahkamlashga qaratildi. Yukning umumiy vazni 290 tonnadan oshib, unda un, guruch, bug‘doy, o‘simlik yog‘i, tez tayyorlanadigan oziq-ovqat mahsulotlari, makaron, shakar va boshqa oziq-ovqatlar mavjud bo‘ldi.
Bu insonparvarlik yuki Hayraton shahrida rasmiy ravishda topshirildi. Marosimda Balx viloyati gubernatori o‘rinbosari Mavlaviy Abu Idris, Tashqi ishlar vazirligi Balx viloyati bo‘linmasi rahbarlari hamda Hayraton shahar hokimligi vakillari ishtirok etdi.
Ular O‘zbekiston Prezidenti Shavkat Mirziyoyevga afg‘on xalqini doimiy qo‘llab-quvvatlagani uchun samimiy minnatdorchilik bildirdi. Shuningdek, O‘zbekistonning Afg‘onistondagi Favqulodda va Muxtor Elchisi Oybek Usmanov hamda Surxondaryo viloyati hokimi Ulug‘bek Qosimov tadbirda faol qatnashdi.
Bu insonparvarlik yordami ikki xalq o‘rtasidagi do‘stlik va hamkorlik rishtalarini yanada mustahkamlashga xizmat qiladi.
