O'zbekiston fuqarolari Italiyada mavsumiy ishlarga yuboriladi
O‘zbekiston va Italiya rasmiylari O‘zbekiston fuqarolarini Italiyaning qishloq xo‘jaligi sohasidagi mavsumiy ishlarga yuborish masalasini muhokama qildi. Bu haqda Zamin.uz xabar berdi.
Uchrashuvda Migratsiya agentligi rahbari Behzod Musayev, O‘zbekiston qishloq xo‘jaligi vaziri Ibrokhim Abdurahmonov, Italiya qishloq xo‘jaligi vaziri Franschesko Lollobrigida hamda “Confagricoltura” vakillari ishtirok etdi. Muzokaralar davomida tomonlar o‘zbekistonlik ishchilarni Italiyaning fermerlik tarmog‘iga jalb etish bo‘yicha kelishuvga erishdi.
Shu doirada O‘zbekiston Migratsiya agentligi Italiyaning “Associazione Imprese Ortofrutticole” uyushmasi bilan hamkorlik shartnomasini imzoladi. Kelishuvga muvofiq, O‘zbekiston fuqarolari uch oydan to‘qqiz oygacha davom etadigan mavsumiy ishlarga yuboriladi.
Uyushma prezidenti Marko Salvi pilot loyiha doirasida 2026 yilda yuz kishini ish bilan ta’minlashga tayyorligini ma’lum qildi. Mazkur tashkilot meva-sabzavot sohasida faoliyat yurituvchi 35 dan ortiq yirik Italiya kompaniyasini birlashtiradi.
Uning faoliyati dehqonchilikdan tortib ishlab chiqarish va eksportgacha bo‘lgan to‘liq qishloq xo‘jaligi zanjirini qamrab oladi. Bu esa O‘zbekistondan qonuniy mehnat migratsiyasi uchun yangi imkoniyatlar yaratadi.
