MAGATE O‘zbekistonda yadroviy tibbiyot rivojiga ko‘mak beradi
Xalqaro Atom Energetikasi Agentligi (MAGATE) O‘zbekistonga yadroviy tibbiyot sohasini rivojlantirish va zamonaviy tibbiy texnologiyalarni joriy etishda yordam berishga tayyorligini rasmiy tarzda tasdiqladi. Bu haqda Zamin.uz xabar berdi.
Bu haqda agentlik tomonidan O‘zbekistonning Venadagi elchixonasiga yuborilgan maktub orqali ma’lum qilindi. Hujjatda MAGATE sog‘liqni saqlash sohasida strategik yo‘l xaritasi va milliy strategiyani ishlab chiqishda faol ishtirok etishga tayyor ekanligi qayd etilgan.
Agentlik O‘zbekistonning yadroviy tibbiyotga bo‘lgan tizimli yondashuvi muhim va o‘z vaqtida amalga oshirilayotganini ta’kidladi. Ushbu loyiha milliy sog‘liqni saqlash tizimini mustahkamlash, aholining onkologik yordamga bo‘lgan ehtiyojini qondirish hamda tibbiy diagnostika va davolash sifatini oshirishga xizmat qiladi.
Hamkorlik agentlikning texnik dasturlari va 2025–2027 yillarga mo‘ljallangan qo‘shma harakatlar rejasi doirasida amalga oshiriladi. Asosiy e’tibor xalqaro xavfsizlik standartlari va ilg‘or tajribalarga mos keladigan ekspert ko‘rsatmalari va maslahatlar berishga qaratiladi.
Shuningdek, MAGATE O‘zbekiston bilan radioterapiya, radiologiya va radiofarmatsevtika kabi sohalarda hamkorlikni kengaytirishga katta qiziqish bildirgan. Ushbu hamkorlik mamlakatning tibbiy infratuzilmasini modernizatsiya qilish va yangi terapevtik usullarni joriy etishda muhim rol o‘ynaydi.
Toshkentda tashkil etilgan Respublika onkologiya va radiologiya markazining mutaxassislari agentlik bilan yaqindan hamkorlik qilib, kasbiy tayyorgarlikdan o‘tadilar. Bu esa yurtimiz tibbiyotining yanada rivojlanishiga xizmat qiladi.
