O‘zbekistonda Toza havo loyihasi boshlanmoqda
O‘zbekistonda 2026–2030 yillar davomida amalga oshiriladigan «Toza havo» umummilliy loyihasi Prezidentning 25 mart kuni imzolagan farmoni bilan rasmiy ravishda yo‘lga qo‘yildi. Bu haqda Zamin.uz xabar berdi.
Ushbu hujjatda loyihaning asosiy maqsadi sanoat, energetika, qurilish va transport sohalarida chiqindilarni kamaytirish hamda tabiiy chang hosil bo‘lishini nazorat qilish ekanligi ta’kidlangan. Dastur doirasida atmosferaga chiqariladigan ifloslantiruvchi moddalar miqdorini 10,5 foizga kamaytirish rejalashtirilgan.
Shuningdek, yirik sanoat korxonalarida avtomatik monitoring stansiyalari va chang-gaz tozalash uskunalarini o‘rnatish ko‘zda tutilgan. Loyihaning ustuvor vazifalaridan biri sanoat obyektlarida chiqindilarni ushlab qolish darajasini 32 foizga oshirish, PM2,5 ko‘rsatkichi bo‘yicha me’yordan yuqori bo‘lgan kunlar sonini kamaytirishdir.
Bundan tashqari, transport vositalaridan havoga chiqariladigan zararli moddalar miqdorini 10 foizga qisqartirish belgilangan. Loyiha hududlar kesimida bosqichma-bosqich amalga oshiriladi.
Dastlab chora-tadbirlar Farg‘ona vodiysida joriy etiladi, keyinchalik markaziy hududlarga kengaytiriladi. Keyingi bosqichlarda mamlakatning janubiy va g‘arbiy hududlari qamrab olinadi, yakuniy bosqichda esa Qoraqalpog‘iston va Xorazmda loyiha to‘liq amalga oshiriladi.
Oldinroq har oyning 10 va 25-kunlari davlat xizmatchilari xizmat avtomobillaridan foydalanmay, ishga jamoat transporti, velosiped yoki piyoda borishi majburiyligi haqida ham ma’lumot berilgan edi. Ushbu loyiha orqali havo sifati yaxshilanadi, ekologik holat nazorat qilinadi va aholiga sog‘lom muhit yaratish maqsad qilinmoqda.
Bu esa jamiyat hayot sifatini oshirishga xizmat qiladi.
