Global Firepower dunyo mamlakatlarining yangi harbiy reytingini eon qildi
Global Firepower tahliliy platformasi dunyo mamlakatlarining harbiy salohiyatini baholovchi navbatdagi yillik reytingni e’lon qildi. Bu haqda Zamin.uz xabar berdi.
Mazkur platforma 2006 yildan buyon davlatlarning mudofaa qobiliyatini tahlil qilib keladi va bu galgi hisobotda 145 ta davlat ko‘rib chiqildi. Har bir mamlakatning harbiy qudrati oltmishdan ortiq turli omillar, jumladan, harbiy texnikalar soni, shaxsiy tarkibning tayyorgarligi, mudofaa budjeti, logistika imkoniyatlari hamda geografik joylashuv kabi mezonlar asosida baholanadi.
Natijada har bir davlatga maxsus harbiy qudrat indeksi belgilanadi. Ushbu indeks ko‘rsatkichi qanchalik past bo‘lsa, mamlakatning harbiy salohiyati shunchalik yuqori hisoblanadi.
Reytingning eng yuqori pog‘onalarini an’anaviy tarzda dunyoning yirik davlatlari egallab kelmoqda. Xususan, Amerika Qo‘shma Shtatlari birinchi o‘rinda qayd etilgan bo‘lsa, undan keyingi o‘rinlarda Rossiya, Xitoy, Hindiston va Janubiy Koreya davlatlari joylashgan.
Bu davlatlar harbiy texnika va resurslar ta’minoti bo‘yicha dunyoda yetakchi hisoblanadi. Ro‘yxatning oxirgi qismidan esa Liberiya, Surinam, Markaziy Afrika Respublikasi, Beliz va Butan kabi davlatlar o‘rin olgan.
Markaziy Osiyo mintaqasida O‘zbekiston o‘z mavqeini mustahkamlab, umumiy reytingda 53-o‘rinni band etdi. Qo‘shni davlatlar orasida Qozog‘iston 58-o‘rinda, Turkmaniston 78-o‘rinda, Tojikiston 100-o‘rinda va Qirg‘iziston 109-o‘rinda qayd etilgan.
Dunyo bo‘ylab harbiy xarajatlar hajmi ortib bormoqda va yillik sarf-xarajatlar 2,6 trillion dollardan oshib ketgan. Aholi jon boshiga to‘g‘ri keladigan mudofaa xarajatlari bo‘yicha Isroil yetakchilik qilmoqda.
Mintaqamizda esa Qozog‘iston har bir fuqaro hisobiga 288 dollar, Turkmaniston 254 dollar va O‘zbekiston 170 dollar mablag‘ ajratmoqda. Mutaxassislar fikricha, bunday xarajatlar nafaqat iqtisodiy imkoniyatlar, balki mintaqaviy xavfsizlik va geosiyosiy vaziyat bilan chambarchas bog‘liqdir.
Xavf darajasi yuqori bo‘lgan hududlarda davlatlar mudofaa sohasiga ko‘proq e’tibor qaratishga majbur bo‘lmoqda.
