Toshkentdagi Askiya bozori yongin xavfsizligi sababli vaqtincha yopildi
Toshkent shahridagi Askiya dehqon bozorining faoliyati yongin xavfsizligi qoidalariga rioya qilinmagani sababli vaqtincha toxtatildi. Bu haqda Zamin.uz xabar berdi.
Bu haqda Favqulodda vaziyatlar vazirligi rasmiy axborot berdi. Poytaxt hududidagi yirik bozorlar va savdo majmualarida o‘tkazilgan nazorat tadbirlari davomida bir qator jiddiy kamchiliklar aniqlangan.
Tekshiruvlar natijasida ayrim obyektlarda yong‘in xavfsizligini ta’minlashga oid talablar qo‘pol ravishda buzilgani ma’lum bo‘ldi. Yakkasaroy tumanida joylashgan Askiya dehqon bozorida aniqlangan holatlar xavfsizlik talablariga umuman javob bermasligi aniqlangach, mazkur hudud elektr tarmog‘idan uzildi va savdo faoliyati vaqtincha to‘xtatildi.
Shunga o‘xshash holatlar Mirzo Ulug‘bek, Bektemir, Chilonzor hamda Uchtepa tumanlaridagi ayrim savdo markazlarida ham qayd etildi. Ushbu obyektlarda ham elektr ta’minoti cheklanib, kamchiliklarni bartaraf etish bo‘yicha ko‘rsatmalar berildi.
Favqulodda vaziyatlar vazirligi mas’ullari ta’kidlashicha, ko‘rilayotgan bu choralar tadbirkorlarning ishiga xalaqit berish yoki ularning faoliyatini cheklash maqsadini ko‘zlamaydi. Asosiy maqsad aholi gavjum joylarda yong‘in xavfsizligini ta’minlash, kutilmagan ko‘ngilsiz hodisalarning oldini olish va fuqarolar hayotini muhofaza qilishdan iborat.
Hozirda aniqlangan kamchiliklar bartaraf etilgach, bozorlar va savdo majmualarining faoliyati belgilangan tartibda qayta tiklanadi. Mutaxassislar tadbirkorlarni yong‘in xavfsizligi qoidalariga qat’iy amal qilishga va xavfsizlik vositalarini doimiy soz holatda saqlashga chaqirmoqda.
