Vazir pedagoglarni bolalarga nisbatan yuksak masuliyatli bo‘lishga chaqirdi
O‘zbekiston Respublikasi Maktabgacha va maktab ta’limi vaziri E’zoza Karimova mamlakatimizdagi barcha tarbiyachi va pedagoglarga murojaat yo‘lladi. Bu haqda Zamin.uz xabar berdi.
Vazir o‘z so‘zida ta’lim tizimida faoliyat yuritayotgan har bir xodim bolalarga nisbatan nihoyatda mehrli, ehtiyotkor va yuksak mas’uliyat bilan yondashishi shartligini alohida ta’kidladi. Vazirning rasmiy kanalida e’lon qilingan ushbu murojaatda qayd etilishicha, bolalar tarbiyasi bilan shug‘ullanuvchi har bir mutaxassis o‘z zimmasidagi vazifaning naqadar ulug‘ va mas’uliyatli ekanligini chuqur his qilishi kerak.
Pedagogning har bir xatti-harakati, so‘zi va munosabati bolaning ruhiy dunyosiga, uning kelajakdagi shaxs sifatida shakllanishiga bevosita ta’sir ko‘rsatadi. Shu bois, ta’lim muassasalarida sog‘lom va xavfsiz muhitni yaratish har bir xodimning birlamchi vazifasi hisoblanadi.
Bundan tashqari, pedagoglardan kasbiy odob-axloq qoidalariga, ichki tartib-intizomga hamda amaldagi qonunchilik talablariga qat’iy rioya etish talab qilindi. Har qanday beparvolik, loqaydlik yoki mas’uliyatsizlik holatlariga yo‘l qo‘yilmasligi, bunday qilmishlar uchun qonun doirasida tegishli choralar ko‘rilishi haqida ogohlantirildi.
Ushbu murojaat so‘nggi kunlarda ayrim maktabgacha ta’lim tashkilotlarida tarbiyachilar tomonidan bolalarga nisbatan yo‘l qo‘yilgan salbiy munosabat va huquqbuzarlik holatlari ortidan e’lon qilindi. Vazir ta’lim tizimidagi har bir xodim o‘z ishiga vijdonan yondashishi, bolalarning huquq va manfaatlarini himoya qilishi hamda ularga mehr-muhabbat bilan tarbiya berishi zarurligini yana bir bor eslatib o‘tdi.
Farzandlarimizning baxtli va xavfsiz kelajagi uchun barcha pedagoglar bir tanu bir jon bo‘lib harakat qilishi lozim.
